Beste mederwerkers en ondersteuners

Glo u werklik dat om die Evangelie getrou te preek ’n impak, deur die krag van die Heilige Gees sal hê, op die lewens van die mense wat dit hoor?  Miskien is u  - diep binne in - te midde van swaar ekonomiese omstandighede, moeg om die werk van die Franse Radiobediening te ondersteun. Miskien is u selfs skepties oor die waarde van so ’n bediening.  As dit die geval is, neem asseblief die tyd om die volgende e-posse te lees wat ek onlangs ontvang het vanaf Kananga , ’n groot stad van die Kasai provinsie in die Demokratiese Republiek van die Kongo.  Theophile K. - ’n Gereformeerde predikant wat die uitsendings van Foi et Vie Réformées op ‘n bekende plaaslike stasie monitor en die werk onder luisteraars doeltreffend kan opvolg, skryf:

Ons Foi et Vie Réformées uitsendings is besig om wonders te doen in Kananga .  Baie briewe wat ek ontvang vra herhaaldelik om dieselfde program weer op die lug te plaas, pas nadat dit uitgesaai is.  Dit is werklik ’n groot vreugde om so iets te beleef.  Jou radio-preke,  bied allerhande dwaalleer wat op dieselfde radio verkondig word doeltreffend die hoof.

Gaan ds Theophile nie bietjie te ver deur die woord “wonders” te gebruik nie?  Enkele dae nadat ek sy e-pos ontvang het, het ’n ander epos vanaf Kananga my bereik, wat deur twee luisteraars geskryf is:

Papa pastoor Kayayan

Groete in die naam van ons opgestane Here en Verlosser Jesus-Christus.  Ons rig saam hierdie brief aan u om te getuig dat die Here teenoor ons goed is, want Hy  het ‘n nuwe werk in ons lewens verrig deur u programme hier in Kananga op die radio te volg.  Ons was Moslems gewees; toe die Here egter ons lewens verander het en vanuit die duisternis na die lig  gelei het - nadat ons na u programme  Foi et Vie Réformées geluister het - het ons besef ons was op ‘n verkeerde pad: Jesus Christus is die enigste weg wat tot die saligheid lei.  Ons is jong bekeerlinge, help ons asseblief deur ’n Bybel aan elkeen van ons te stuur. Ons bid vir u bediening, sodat die God van die hemele u verder sal seën in al u ondernemings. 

Hartlike groete in Christus. 

Richard K. en Jean Pierre M. in Kananga

Onlangs het ek persoonlik verskeie vrae beantwoord wat luisteraars uit Kananga via epos aan my gerig het.  Iemand het geskryf:

Ek skryf aan u as ’n luisteraar van Foi et Vie Réformées wat my gunsteling program op ons plaaslike radiostasie geword het. Verlede week het ek en my pa die boodskap met die titel “Die Kerk onder die Kruis” gevolg [dit is ‘n reeks oor die vervolgde Kerk deur die eeue – E.K.].  Die inhoud hiervan was ryk en dit lei my om die volgende vraag aan u te stel: die Bybel verbied om dood te maak.  Hoe kan ’n Christen dan ’n soldaat wees en homself aan bevele van bevelvoerders onderwerp? Sal hy nie sondig as hy doodmaak nie?  Kan ons praat van die teregstelling van die Kerk vandag?

U kan dink dat in ’n land soos die DRK, wat deur ‘n burgeroorlog in sy oostelike gebied geteister word, en waar die amptelike weermag net soveel grusaamhede pleeg as die rebelle groepe wat dit probeer bekamp en uitwis, so ’n vraag nie so maklik is om te beantwoord nie.  Die antwoord kan nie simplisties wees nie.  ’n Bybelgefundeerde antwoord sal egter altyd lig en perspektief werp vir mense wat desperaat is om dit te ontvang.

Beste vriende, ek wil graag beklemtoon dat u volledig deel is van ’n ketting van medewerkers wat dit moontlik maak vir Foi et Vie Réformées om hierdie luisteraars en vele ander te bereik.  Ja, die Evangelie, wanneer dit getrou verkondig word, het ’n diepe impak op die lewens van mense!  Hierdie e-posse spreek boekdele in dié opsig!  Pastoor Théophile en ekself; die Reformed Radio Administration Committee wat ons werk vanaf Noord-Amerika ondersteun; my plaaslike gemeente hier in Pretoria; ander Gereformeerde gemeentes in Suid Afrika; die klankingenieur wat die programme opneem; my assistent wat die CD’s dupliseer en hulle die hele Afrika in stuur, asook na Frankryk en Quebec in Kanada, is almal skakels in ’n ketting van medewerkers waarvan u ook volledig deel is.  Sonder u as noodsaaklike skakel, sal hierdie ketting breek, en die werk van Foi et Vie Réformées eenvoudig gestop moet word.  Hierdie ketting van medewerkers is nie deur myself nie, maar deur die Voorsienigheid  van die Almagtige God, deur die werking van die Heilige Gees en ter wille van die verkondiging van die Koningskap van die Seun daargestel.  Glo u dit werklik?

Saam verenig, in die geloof wat eenmaal aan die heiliges oorgelewer is (Judas 1)

Ds Eric Kayayan